تورکی خلقلرنینگ کینگ ترقلگن تصوفی طريقتي

يسويليك (يسويه):
الوغ بیگ
توركي خلق لرنينگ بويوك صوفي سي خواجه احمد يسوي اساس سالگن يسويليك طريقتي بوتون تركستان كينگ ساحه سيده ترقه ليب، عصرلردواميده منطقه خلقلري اوچون روحي تينچ ، فيض وبركات بولاغي بوليب كيلگن.
تورك بويوك تدقيقاتچي سی وادبيات شناسي محمد فواد كوپرولوزاده«تورك ادبياتي ده ايلك متصوف لر» ناملي اوز قيمتلي كتابيده بوباره ده كينگ وقانيقرلي معلومات لر بيريب، اوشبو تصوف مكتبي تركستان خلق لري نینگ روحي تربيه سيگه قنچه تأثير اوتكزگنيني اوقديريب اوته دي. اونينگ معلوماتي گه كوره يسويليك طريقتي گه بنأ حقيقي صوفي رياضت ومجاهده گه بيريليب ،حيات ناز ونعمت لريدن ، حلاوت، شهوت و عشرت پرست ليكدن اوزاق توريشي لازم. يسويه طريقتيده مريد قوييده گي آداب ني رعايه قيليش گه مجبور حسابلنه دي:


1- هيچ بيركيمسه ني اوزشيخي دن افضل بيلمه – سين.
2- مريد ذكاوتلي وادراكلي بوليب ،شيخ نينگ رموز واشارتلريني بيليشی كيرك.
3- شيخ نينگ هربيرسوزيگه ايشانيب ،اوندن صادربولگن هربيرايشگه راضيليك كوزي بيلن قره شي كيرك.
4- شيخ نينگ برچه خدمت لريني دنگسه ليك بيلن ايمس، بلکه چققان ليك بيلن بجرسين.
5- سوزده صادق، دلده ساغلام بوليب ،هيچ قچان شك وشبهه گه اورين قویمه سين.
6- وفالي بوليب،اوزعهدي (بيرگن سوزی) اوستیده تورسين.
7- هردايم برچه مال وملكيدن اوزشيخي يوليده وازكيچيش گه تياربولسين.
8- شيخ نينگ برچه سرلريني سقلب، اولرني هيچ قچان فاش ايتمه سين.
9- شيخ نينگ برچه اوگيت ونصيحت لريني نظرده توتيب، هيچ قچان اولرني اونيتمه سين.
10- الهي وصال اوچون شيخ يوليده جانيدن اوتيب، باشيني بيريش گه تياربولسين.
طريقت ملكي نينگ احكامي آلتي دور: معرفتِ حق، سخاوتِ مطلق، صدقِ محقق، يقينِ مستغرق، رزقِ معلق، تفكرِمدقق.
شيخ ليك ومقتداليك (رهبرليك) اركاني هم آلتي دور:علم دين و يقين، حلم مبين متين، صبرجميل ، رضاي جليل ،اخلاص جليل ،قرب جزيل .
اسلام انسيكلوپيديه سي  (دايرةالمعارفی)نینگ بيرينچي  جلديده “خواجه”سوزي اوستيده بيريلگن معلومات لرگه كوره ،نقشبنديه طريقتي هم يسويليك طريقتيدن كيليب چيققن بوليب، خواجه احمد يسوي سلاله سيدن كيلكن لركبي نقشبنديه طريقتي اساسچي سي بهاءالدين نقشبند واوشبوطريقت گه منسوب بولگن بويوك مرشد لرهم خواجه عنواني بيلن شهرت قازانگن لر.
فواد كوپرولوزاده فكريچه سلوك سلسله سي نقطۀ نظريدن خواجه احمد يسويگه منسوب بولگن طريقت لر، باشلنغيچ دورده ايككي گه بولينه دي: اولرنقشبنديه وبكتاشيه طريقت لريدن عبارت ايدي. بولردن تشقري ايريم كیچيك يونليش لرهم يسويليك طريقتيدن كيليب چيققن، ليكن اولرني مستقل طريقت لرديب حسابلش توغري ايمس . اونينگ فكريچه نقشبنديه طريقتي ايككي كيشي آرقه لي يسويه طريقتي بيلن باغلنه دي. اولرقثم شيح وخليل آتا دورلر.
قوشيمچه قيليب ايتيش ممكن كه نقشبنديه طريقتي اساسچي سي بهاءالدين نقشبند حضورأ وغيبأهردايم يسويه طريقتي مرشد لري بيلن علاقه ده واولرنينگ خدمتي ده بوليب كيليب، اولردن کسب فيض ايتگن. «مقامات حضرت خواجۀ نقشبند» كتابي نينگ مؤلفي ابوالمحسن محمد باقربن محمد علي، خواجه علاوالدين عطارآرقه لي خواجه نقشبند نينگ اوزتيل لريدن نقل قيليشي چه مولانا عارف ديككراني دن كيين، سيدامير كلال توصيه سيگه بنأ خواجه احمديسوي اولادلريدن وتورك لر بويوك شيخ لريدن بيري بولميش ،قثم شيخ يانيگه باريب ايككي اوچ آي اونينگ خدمتي ده بوله دي. اوندن كيين قثم شيخ خواجه گه قره ب «مينينگ توقيز ته اوغليم بار، سين اونينچي سي وهمه سيدن كوره مينگه يقينراق سن» ديدي. شونينگ اوچون خواجه نقشبند هردايم «هركيم تورك مشايخي ني تنيمه سه،  طريقت دن اميد سيزبوليب، متعرض گه ایلنگوسيدور»(هركه را شناخت مشايخ تورك نباشد،هرآيينه ازطريقت نوميدشود ومتعرض شود) ديب تاكيد لرديلر.
اوشبوكتاب، نفحات الانس روايت لريدن، شونینگدیک كوپرولوزاده صلاح الدين بن مبارك البخاري نينگ «مقامات بهاءالدين نقشبند» ناملي اثريدن آليب بيرگن روايت گه بنأ، حضرت بهاءالدين شوندي ديگن ايكن لر: بيرنيچه كيچه توشوم ده تورك مشايخي نينگ بويوك لريدن بيري بولمیش حكيم آتا (قدس سره) ميني بير درويش گه تاپشيرديلر. اويغانيشيم بيلن درويش نينگ صورتي ذهنيمده بار ايدي. توشوم ني صالحه بوبیم گه ايتديم. بوبیم ديدي لركيم، تورك مشايخي دن سينگه نصيبه یيتگوسي دور. اوندن سونگ مذكوردرويش بيلن اوچره شوني ايسترديم. بيركوني آهنگران دروازه سيدن چيقگونچه اوشه درويشگه دوچ كيلديم. ساچ لري مولهه لر (شيداوشيفته قلندرلر) كبي، باشيده مينگ بخيه ليك قلپاق، قوليده عصا سي بارايدي. مينگه هيچ باقمه دي. مين اونينگ ايزيدن بارديم. او،«مرغ كشي» ديگن كوچه گه یيتيب باريب، بيراويگه كيرگندن كيين مين اويگه قيتديم. ايرته سي دوستلردن بيري كيليب، خليل آتليك تورك شيخزاده سي، سين بيلن اوچرشماقچي  ديدي. مين قوانيب اورنيمدن تورديم. كوزفصلي ايدي. بخارانازونعمت لريدن بيرمقدارني آليب بارديم. او،اوزي اوي نينگ بيرگوشه سيده و بيرجمعيت اونينگ آلديده اولتيرگن ايدي. سلام بيريب اوتيرديم. توشوم ني ايتيش اوچون بيرتورتكي مينده تاپيلدي، ليكن اوبيردن مينگه باقيب ، توركچه قيليب «اولكيم سينينگ كونگليينگده دور،اوزي بيزگه عيان دور، ايتماغي نه حاجتدور» ديدي. حاليم اوزگردي،اخلاصیم اونگه آشدي، اونينگ ملازمتيده (خدمتي ده) بولديم. اوندن عجايب حال لر صادربولردي . آلتي ييل دن كيين او ماوراءالنهر پادشاهي بولدي.
اوني سلطان خليل ديب اتر ديلر. اوشل آنلرده هم اوندن بويوك «حال لر» كورينردي (حال معنوي مطلب لرني توغريدن- توغري واسطه سيز بيليب آليشدن عبارت بوليب، معنوي تجربه لر، طريقت يوليدن باريش  ياكه الهي موهبت ثمره سي صفتيده حاصل بوله دي- مؤلف).
پادشاه ليك چاغلريده هم آلتي ييل اونينگ خدمتيده بولديم. پادشاه لرگه خدمت قيليش آدابي ني اورگنديم واونينگ آداب وحرمتي ني بجا كيلتيرديم. خلوتده اونينگ خاص ومحرم صحبتداشي مين ايديم. اوندن كيين اوشه طرزده اوليا لرخدمتي ده بولديم. او، مين بيلن گاهي قتتیق، گاهي يومشاق معامله ده بوليب،   چيك سيز شفقت ومهربانليك كورسه تردي. سونگره اواوز دشمن لري مقابلي ده مغلوبيت گه اوچره دي . بيرلحظه ده سلطنت ايشلري كوك كه ساووريلدي. بوتون دنيا ايشلريدن كونگليم ساويب، بخاراگه كيلديم و ريورتون ده اقامت قيلديم.
روس عالمی و. بارتولد،”اورته آسیا تورکلری تاریخی” ناملی کتابیده بو حقده یازه دی: 1340 ییلی، کییینراق سلطان لقبی بیلن اتلگن بیرتورک شیخی، حاکمیت تختیگه کوته ریلدی. او بیرمد ت بخارالیک بویوک روحانی بهاوالدین نقشبند (1318-1389) نینگ روحانی رهبری ایدی. بهاوالدین نینگ ترجمۀ حالیگه کوره، بیر کیچه تورکلرنینگ مشهور قد یسی – حکیم آتا اونینگ توشیگه کیره دی. اوشبو توشنی تعبیریگه کوره، اونینگ مرادی یا که روحانی رهبری بیر درویش بوله دی. بهاوالدین، خلیل تورک بیلن اوچره شکندن کیین، اوندن قتتیق تاثیرلندی، اوز توشی نینگ تعبیریگه ایشا نیب، سلطنتگه ایریشگونچه اونینگ یانیده بولدی و سلطنتدن کیین هم اونینگ مریدی بولیب قالدی(کتابنینگ 231 بیتی).
كورينيب توربيدي كيم حضرت بهاءالدين نقشبند،اوزاق مدت یعنی 12 ييل دواميده خليل آتا (سلطان خليل) ملازمتي ده بوليب، اونينگ نفس وصحبتي دن فيض آلگن. اوندن صادربولگن غرايب حالت وعجايب كرامت لر،اونده چوقور تأثير قالديريب، اوني تربيه له گن. ليكن فواد كوپرولوزاده يازيشي چه،حقيقت ده خواجه بهاءالدين نينگ معنوي مربي سي خواجه عبدالخالق غجدواني ايدی. شونينگ اوچون اوني خواجه گان سلسله سيدن حساب لش توغري بوله دي. نقشبنديه طریقتی بيرتاماندن قثم شيخ وخليل آتا آرقه لي يسوي ليك تأثيري آستيده بولگنید يك، باشقه بير تاماندن عبدالخالق غجدواني نينگ احمد يسوي دن سونگره يوسف همداني خليفه سي بولگني نقطۀ نظريدن طبيعي كيم كوپ جهت لردن اونينگ يسوي ليك گه اوخشش تامان لري بار.
رشحات ده يازيليشيچه يوسف همداني وباشقه خواجه لرنينگ ذكري جهريه ايدي . فقط خواجه عبدالقادر غجدواني خضر تمانيدن ذكر خفيه گه مامور بولگن ايدي.
منقبت لرگه كوره خواجه احمديسوي حضرت خضر توصيه سي ويوللنمه سی اساسيده كونگل انقباضي(سيقيليشي) ني آچیش اوچون جهريه ذكرگه باشليدي.
نقشبندیه طریقتی خلیفه لریدن بیری مخدوم اعظم لقبی بیلن مشهوربولگن، حضرت سید احمد بن جلال الدین” رسالۀ بابریه ” ده تصوف طریقتی گه عائد بعضی بیرقاعده لرنی هرتامانله شرحلب،”ذکر خفیه ” همده  “ذکرجهر” مسئله لریگه توختله دی. مؤلف، پیغمبر ذکرنی خفی صورتده تنلگن  بولسه هم، “تابعین و تبع تابعین” (پیغمبر صحابه لری بیلن اوچره شگنلر وسونگره اولربیلن ملاقاتده بولگن ذاتلر) زمان طلبیگه موافق ذکرجهر (بلند آواز بیلن ذکر قیلیش) گه رخصت بیریب، اوزلری هم ذکرجهر قیلیشگن ، دیب تاٌکید لیدی.اوذ کر خفیه نی عزیمت یعنی قصد وشریعت یولی و ذکر جهرنی رخصت یولی دیب ایضاحلیدی.
مخدوم اعظم یازیشیچه، خواجه لرعزیمت یولیدن بارگن بولسه لرهم، اولردن بعضی لری زمان تقاضاسیگه قرب، قوملری نینگ خصوصیت لرینی نظرده توتگن حالده جهرقیلگنلر.
مثال صفتیده او، حضرت خواجه احمد  یسوی  تورکستانده  ذکرنینگ جهر شکلینی اختیار قیلگنلیک لرینی، حتی ” ذکر ارره ” (ارّه)  آرقه لی کوپ کیشیلرنی یولگه سالیب، اولرنی اولوغ سعادتگه یول لگن لیکلرینی ایته دی.
بو اورینده شونی تاًکید لش کیرک که “ارره” ذکری یسویه طریقتیگه خاص بولیب، اونی اجراقیلیش چاغیده جهرچیلرگروهی اوزحلقوم (تاماغ) لریدن، ارره قیلیش وقتیده چیقه دیگن صوت کبی  بیر موزون،  متناسب و یاقیملی آواز چیقریب ذکر قیلردیلر. جهر ذکری ایریم نقشبندیه طریقتی  وکیل لریگه یاقمگن  بولسه هم، ایریم لری اونی ایشیتیب کورگندن کیین قایل  قالیب، اونینگ تاًثیرچنلیگی و جذبه گه سالیش  کوچینی تصدیقلگنلر. حقیقتاٌ هم  جهر قیلیش ملکه سیگه  ایگه بولگن و صوفیانه جذبه گه  بیریلگن بیر گروه  تامانیدن، ریتم بیلن  عملگه  آشیریله دیگن  بوندای  بیرذکر، حاضرگی  زمان موسیقی سیده “خور”  گروهی  تامانیدن اجرا ایتیله دیگن آهنگلرگه اوخشب  کیته دی.
مخدوم اعظم ذکر حقیده سوزلریگه دوام بیریب یازه دی:« هیچ عیب نیست، بغا یت خوب است، طریق انبیای مقدم نیز همین بوده است» ( بونده هیچ عیب یوق، نهایت یخشیدور. اوتگن پیغمبرلرنینگ یولی هم شوندی بولگن ایکن. (  مؤلف سوزیگه دوام بیریب «  پیغمبرلرنینگ هر بیری اوزیگه خاص شیوه بیلن اوز قوملرینی یولگه سالگنلر، سوزلرنینگ فرقی آدملر نینگ احوالیده گی  تفاوتلردن  کیلیب  چیقه دی،  ایتیلگنی دیک اصلیده همه نینگ مقصدی  بیر، صورتلروشکل لرنینگ فرقی ایسه شیوه واسللوبلردن باشقه نرسه ایمس» دیگن فکرلرنی بیان ایته دی.
اوندن کیین مخدوم اعظم جهر بیلن ذکر قیلگن خواجه لرنینگ هر بیرینی علیحده قید ایتیب اوته دی. جمله دن خواجه عارف ریوگری، خواجه محمود فغنوی، اولرنینگ خلیفه لریدن خواجه علی رامتانی، خواجه  محمد  بابای سماسی، اولرنینگ خلیفه لریدن  سید امیر کلال اوشبو شیوه ده عمل قیلیب کیلگنلر. مؤلف، بویوک خواجه بهاؤالدین نقشبند امیر سید کلال نینگ مریدی ایدیلر، دیدی.
مخدوم اعظم بعضا ذکر خفیه و ذکر جهر، یسویلر ونقشبند یلرآره سیده اختلافلرگه سبب بولیشینی توشونگنی اوچون، جهرذکری نینگ توغری ایکنلیگی نی اثباتلش مقصدیده قوییده گیدیک استدلال قیله دی :«حق سبحانه و تعالی , مین استغفار صوتینی( کیچیریم تیلش سیسینی ) سیوه من دیگن ایمیش. » البته صوت یعنی آوازدن، جهر ذکری نظرده توتیلگن .
رشحات روايت لريگه کوره نقشبنديه نینگ یيتوك مرشد لريدن بيري خواجه عبدالله احراربعضأ بوشيوه گه قرشيليك كورستگن بولسه هم، بيرمرتبه شیخ محمود تركستان خليفه لريدن بيري بولميش كمال شيخدن “ذكر ارره” ني اجراايتيش ني التماس ايته دي…
سونگره «یيتر، كونگليميزگه درد سرايت ايتدی» و باشقه بيرروايت گه کوره« یيتر، عرشدن فرشگه قدرياندي، اگربيرمنكر، بو قنده ي ذكردورديب سوره سه، اونگه قنده ي جواب بيريشني بيليب آلديم» ديب اوشبو بيت ني اوقيگن ايكن:
مرغان چمن به هر پگاهي          خوانند ترا به اصطلاحي

ترجمه سي : چمن قوشلري هر تانگ چاغي، سيني بيرباشقه نام بيلن اتب سيريديلر.
فواد كوپرولوزاده يازيشي چه تركستان تورك لريدن بيري بولميش حزيني ناملي بير درويش «جواهر الابرار   من امواج البحار» ناملي بيراثر يازيب،اوچينچي سلطان مراد گه هديه قيلگن ايكن. 324  بيتلي اوشبو كتاب- نينگ 221 بيتي توركچه (اوزبيكچه – ج) وقالگني ايسه فارسي تيلده يازيلگن. او، اورته آسياده تصوف جرياني عالي بيرسويه گه یيت بارگني اوچون، 12يشر- ليگیده جذبه گه بیريليب، سونگره سيدمنصور قاشتراش دن كسب فيض ايتگن. 19 ياشیده كمرو خرقه آليشگه موفق بوليب، اوليا لرمناقبي ني يازيش گه باشله گن. كوپرولوزاده فكريچه اوشبو اثر يسوي ليك گه مخصوص بولگن تعليماتني ياريتيش اوچون اساسي وبيرينچي منبع بوليب خدمت قيليشی ممكن. “جواهرالابرار”ده ارره ذكري حقيده 12بَيت ليك بيرشعربيريلگن. اوندن بيرنيچه بيت نينگ ترجمه سي:
– بيزنينگ بوذكريميز كونگل كوزگوسيگه صيقل بيره دي.
– ارره ذكري، الهي اوقیانوس نينگ تولقيني دير.
– ارره ذكري اوزجاذبه سي بيلن روح عالمی نینگ ايشيك لريني آچيب بيره دي.
– ارره ذكري فرياد وآه وناله بيلن قوشيليب ،اوندن گاهي «حي»، گاهي «هو» وگاهي «الله» سوزلري ينگريدي.
– ارره ذكري ازليت دريا سي نينگ تولقينلري بوليب، اوندن وصال دُرلريني تيريب آليش ممكن.
يسويه طريقتي نينگ مرشدلري حكيم آتا (سليمان باقرغاني)، زنگي آتا، اوزون حسن آتا، سيداحمد آتا (سيد آتا)،صدرالدين محمد(صدرآتا) و  شيخ محمود تركستاني وباشقه كوپ تنيقلي خليفه لري شاه لرودولت ارباب لري نينگ دقت واعتباريني تارتيب كيليب، اولرتامانيدن كتته حرمت وايشانچ گه سزاواربولگنلر. مثال صورت ده بغراخان قاره خانیلر سلطانی اوزقيزي عنبر آناني اوشبوطريقت نينگ بويوك مرشدي حضرت حكيم آتا گه تورموشگه چيقره دي. حكيم آتا وفاتيدن كيين اونينگ اورين باسري حضرت زنگي آتا، شيخ نينگ معنوي دلالتيگه بناً او بيلن تورموش قوريشني التماس قيله دي ،عنبرآنا ايسته مگن بولسه هم، زنگي آتا دن كورگن كرامت نتيجه سيده تقديرگه تن بيره دي.
بوملكه، اينگ عالي طبقه – شاه عايله سيگه منسوب بولگني گه قره مسدن ،هرايككله روحاني رهبربيلن صمیمانه حيات كيچيره دي و اوز انساني ليگي بيلن بوگون گه قدر نامي بويوك انسان لر قطاريدن اورين آليب ،حرمت و آلقيش لرگه سزاواربوليب كيله دي.
زنگي آتا بيرعادي بركمال انسان، روحانيت عالي درجه لريگه كوتريلگن صوفي، كوپ مريدلرني تربيه لب يوكسك مرتبه لرگه یيتيشتيرگن مربي، عوام وخواص نینگ حرمت و ايشانچي ني اوزيگه تارتگن مرشد صفتيده، اورته آسيا شاعرلري اثرلريده اوزيگه خاص اورين توتيب كيلگن.
كوپرولوزاده يازيشي چه شمسي اسم لي بيرشاعرنينگ زنگي آتا گه خطابأ يازگن مثمني(سکیزلیگی) مناجات شكليده ديوان حكمت ده نشر ايتيلگن. اونينگ مطلعي قوييده گي ديك:

اول سيد اكرم حقي، يازنگي بابا همتي !
اول مفخر آدم حقي، يازنگي بابا همتي!

شونينگديك مشهورشاعركمي تاشكندي اونينگ منقبتي ده بيرشعر يازگن. قوييده گي بيت لر اوندن كيلتيريله دي:
درگۀ حق پاسباني ،حضرت زنگي آتا.
سرّ غيبي راز داني، حضرت زنگي آتا.
ايردي لرظاهر سيه فام و وليکن باطنأ،
تاپتيلرنور وضياني، حضرت زنگي آتا.
طرفه بير كشف وكرامت كورگوزوب دهر اهليغه
آلدي لر عنبر آناني، حضرت زنگي آتا.
ايله ديلر تا مماتيدن بيري وردِ زبان،
«الله – الله ربنا» ني حضرت زنگي آتا.

«خزينة الاصفيا» كتابيده، اونينگ وفاتي تاريخي    (وفات ييلي)حقيده قوييده گي شعر قيدايتيلگن: اوشبوشعرده اونينگ وفات ييلي د ن تشقري او،دنياد ن كوز يوميشي بيلن يوكسك بهشت گه يول آليب ،الله وصاليگه مشرف بولدي دييله دي:
چودرخلد معلي ازجهان رفت،
جناب خواجۀ مسعودزنگي.
ولي الله  مرشد گووصالش،
دوباره عاشق مسعودزنگي.
نقشبنديه طريقتي گه بولگنیديك، يسويه طريقتيگه هم صادق مخلص بولگن شاعرلردن بيري عبيدي تخلصي بيلن شهرت قازانگن، صوفي مشرب یيتوك شاعر و سوزاستادي بخارا پادشاهي عبيدالله بهادرخان ايدي. اونينگ 700 بيت گه يقين كلياتي ده، كوپ دنيوي شعرلر قطاريده، عرفاني وصوفيانه مضمون ده يازيلگن اوزبيكچه، فارسچه وعربچه شعرلرني كوره ميز. مذكورطريقت لرني تلقين ايتيشده اونينگ شعرلري كتته اهميت گه ايگه بوليب، هر قندي مقتاو گه سزاواردير.عبيدي كلياتي نينگ يگانه قوليازمه نسخه سي ابوريحان بيروني ناميده گي شرق شناس ليك انستيتوتي كتبخانه سيده پ.8931رقم ده سقلنماقده.
عبيدي يازگن عرفاني شعرلراهميتي ني شوندن بيليب آليش ممكن که یيريك متصوف مخدوم اعظم لقبي بيلن شهرت قازانگن حضرت سيداحمد بن جلال الدين كا ساني اوزي نينگ ايككي كيچيك رساله سيني اونينگ بيرغزلي وبيررباعيسي شرحي گه وبير كتته راق رساله سي ني اونينگ اونته رباعي سي وبيرغزلي شرحي گه بغيشله گن. اوشبورساله ترجمه سيني تصوف و انسان کتابیده «رباعي لر شرحي رساله سي» سرلوحه سي آستيده اوقيشينگيز ممكن.
عبيدي ديوانيده خواجه احمديسوي مدح ايتيلگن عجايب بيرشعر بار. اوني اعتبارينگيز گه حواله قيله ميز.
برچه مشايخ سروري،سلطان خواجه {1}احمد يسّوي
سانسيز مريلر رهبري، سلطان خواجه احمديسّوي
خضر آتا نينگ همرهي، آگاه لرنينگ آگهي ،
دايم الهي والهي، سلطان خواجه احمد يسّوي
الله ذكري همدمي، برچه ولي لر اعظمي
سر الهي محرمي، سلطان خواجه احمد يسّوي
هم عشق اهلي صادقي، عشاق خيلي وامقي
ديدارگنجی شايقي، سلطان خواجه احمد يسّوي
اوغلي شهيد اولغان زمان، بيردي خبربيرناتوان
ابلق آتين بيردي روان، سلطان خواجه احمد يسّوي
لازالَ رأسُ الصابرين ،منظورُ كلِّ الناظرين
سلطانُ كلِّ العارفين،سلطان خواجه احمد يسّوي
بخت وسعادت اختري، جان مخزني نينگ جوهري
حكمت بهارين گوهري، سلطان خواجه احمد يسّوي
اي دوست كان مرحمت ،هم بحر علم ومعرفت
سلطان ملك عافيت، سلطان خواجه احمد يسّوي
كونگلومده قالمسدورغميم، سيزكبي بولسه محرميم
گربولسه هردم همدميم، سلطان خواجه احمديسّوي
بولغان هوا يوليده سد، ايلب هوا ايشيني رد
ايلر باريميز گه مدد، سلطان خواجه احمد يسّوي
عزت سماسي خاوري،هم عشق ملكي داوري
مسكين عبيدي یاوري، سلطان خواجه احمد يسّوي
——————————————————————
{1}« خواجه احمد يسوي »وزن بوزيلمس ليگي اوچون «خواجَه احمد يسسَوي» یعنی خواجه دن کیین الف نینگ حذفی و سین نینگ تشدیدی بیلن اوقيليشی كيره ك.
منبع:«تصوف و انسان» کتابی، تاشکینت، “عدالت” نشری،2001 ییل.
مؤلف: شرعی جوزجانی
کیریل یازوویدن،عرب الفباسیگه اوگیرگن:
عبدالغفور دستیار

Short URL: http://www.turkicpress.com/tur/?p=208

Posted by on Nov 7 2010. Filed under تورلوگ یایین لر. You can follow any responses to this entry through the RSS 2.0. You can leave a response or trackback to this entry

You must be logged in to post a comment Login

 نامه سرگشاده مردم هزاره از سراسر جهان به نهادهای دفاع از حقوق بشر، شخصیت های شناخته شده و مقامات بین المللی

Search Archive

Search by Date
Search by Category
Search with Google

Photo Gallery

 نامه سرگشاده مردم هزاره از سراسر جهان به نهادهای دفاع از حقوق بشر، شخصیت های شناخته شده و مقامات بین المللی
ورود | Designed by Gabfire themes